Sau­tján mörk Gunnars dugðu skammt

Íslandsmeistarar Vals komust 1-0 yfir í fyrstu sókn leiksins gegn Fram en það var í eina skiptið sem liðið leiddi í leiknum. Fram komst fljótlega yfir og náði mest fimm marka forystu í sérlega hröðum og skemmtilegum fyrri hálfleik.

Munurinn var þrjú mörk í hálfleik, 21-18 fyrir Fram.

Enn jók Fram forskotið eftir hlé og gestirnir héldu Valsmönnum í seilingarfjarlægð allan leikinn. Ótrúlegum 87 marka leik lauk með 47-40 sigri Framara á Hlíðarenda.

Með sigrinum fer Fram að hlið KA á toppi deildarinnar með fullt hús eftir tvo leiki en valur er með tvö stig.

Ungstirnið Gunnar Róbertsson skoraði hvorki meira né minna en 17 mörk fyrir Val í leiknum og það aðeins úr 19 skotum. Ekki nóg með það heldur gaf Gunnar ellefu stoðsendingar að auki.

Hjá Fram skoraði Dagur Fannar Möller tíu mörk úr tíu skotum af línunni og Max Emil Stenlund skoraði einnig tíu úr skyttunni.

Komust 9-1 yfir en unnu aðeins með einu

Víkingur leitaði sinna fyrstu stiga eftir tap í fyrsta leik en KA gat viðhaldið fullkominni byrjun sinni er liðin mættust í Virkinu við Safamýri.

Segja má að byrjun leiksins hafi verið skrautleg. KA skoraði níu af fyrstu tíu mörkum leiksins og leiddu því 9-1 eftir tólf mínútna leik. Víkingur svaraði með fjórum mörkum í röð til að laga stöðuna aðeins og lokuðu vörninni betur.

Munurinn var aðeins þrjú mörk í hálfleik, 12-9 fyrir gestina að norðan.

KA hélt nokkurra marka forystu gott sem allan síðari hálfleikinn og fátt sem benti til þess að Víkingar sköpuðu einhverja spennu af viti. Munurinn var að endingu aðeins eitt mark en KA hélt forystunni til loka og Víkingur minnkaði muninn í 26-25 á lokasekúndunni.

KA er því með fullt hús eftir tvo leiki á toppi deildarinnar en Víkingur leitar fyrsta sigursins enn.

Bjarni Ófeigur Valdimarsson og Dagur Gautason voru markahæstir hjá KA með fimm mörk hvor, Sigurður Páll Matthíasson skoraði sjö mörk af línunni hjá Víkingi en Gunnar Hrafn Pálsson sex.

Upplýsingar um leikina eru fengnar af HBStatz.