Stuðningur við Trump kostaði sam­bandið við Elon

Þetta kemur fram í nýlegu hlaðvarpsviðtali við Errol Musk, suðurafrískan verkfræðing og föður Elon Musk. 

Þar segir Errol að sonur sinn hafi í fyrsta skipti horfst í augu við hver hann sé í raun og veru. „Þangað til nýlega hefur hann verið eins konar fígúra á sviði,“ sagði Errol um Elon.

Feðgarnir hafa nýlega náð sáttum eftir að Elon afneitaði föður sínum fyrir sjö árum. Ástæðan var þá sögð vera að stjúpsystir Elon, Jana Bezuidenhout, var ólétt eftir Errol, stjúpföður sinn. Elon skar þá á tengslin við föður sinn og lýsti honum sem „hræðilegri manneskju“. Fyrir tveimur árum kom síðan í ljós að Jana og Errol eignuðust annað barn 2019.

Errol telur raunverulegu ástæðuna fyrir reiði Elon tengjast stuðningi Errol við Donald Trump.

„Elon var svoddan helvítis Demókrati,“ segir Errol. „Það er ástæðan fyrir því að sambandið mitt við syni mína breyttist. Það byrjaði með ágreiningi um Donald Trump í sjötugsafmælinu mínu.“ 

Errol rifjar upp hvernig Elon mætti með þáverandi kærustu sína, Amber Heard, og fjölda Hollywood-leikara, þ.á m. Scarlett Johansson og Jon Favreay, í afmælisveislu Errol í Cape Town. 

Hún fór fram 2016, skömmu fyrir forsetakosningarnar í Bandaríkjunum, og spurðu gestirnir Errol hvort hann styddi Donald Trump í raun og veru og játaði hann því. Synir hans hafi báðir orðið brjálaðir út í föður sinn.

Segir soninn hægri hönd Trump

„Þegar þú kemur frá Suður-Afríku halda vinstrimenn að þú sért nasisti,“ sagði Errol. Synir hans hafi báðir gerst „ofsalega“ frjálslyndir og snúið baki við Suður-Afríka og rótum sínum, þar með talið Errol.

Nú virðist hins vegar sem Elon hafi sæst við föður sinn enda sjálfur orðinn einn stærsti stuðningsmaður Trump í dag. Elon sem er einn ríkasti maður í heimi og á rafbílafyrirtækið Teslu, geimferðafyrirtækið SpaceX og samfélagsmiðilinn X (áður Twitter) hefur undanfarna mánuði helgað líf sitt því að styðja við Trump.

Frá því Trump vann kosningarnar í byrjun mánaðar hefur Musk verið nær óskiljanlegur frá forsetanum tilvonandi. Hann hefur varla farið af sveitasetri Trump í Mar-a-Lago í Flórída, ferðast með Trump til New York og Washington og tekið þátt í símtölum Donalds við Vólódímír Selenskí Úkraínuforseta.

„Þó Elon sé ekki varaforseti er hann eins og hægri hönd Trump,“ sagði Errol um son sinn. Þá spáði Errol því að stríðinu í Úkraínu myndi ljúka mjög fljótlega nú þegar Trump tæki við sem forseti.

Móðurafi Elon mikill stuðningsmaður aðskilnaðarstefnu

Einn áhugaverðast hluti viðtalsins fjallar um fjölskyldu Mae Musk, fyrrverandi eiginkonu Errol og móður Elon. Errol segir foreldra hennar hafa verið mikla stuðningsmenn aðskilnaðarstefnu Suður-Afríku.

„Foreldrar hennar komu til Suður-Afríku frá Kanada af því þau voru svo hlynnt Afrikaner-stjórninni,“ sagði Errol um þau Winnifred Fletcher og Dr. Joshua Norman Haldeman.

Fjölskyldan hafi flutt til Suður-Afríku árið 1948 þegar stjórn Suðurafríska Þjóðarflokksins tók við völdum og tók upp aðskilnaðarstefnu kynþátta. Ekki nóg með það heldur segir Errol að fjölskyldan hafi verið í nasistaflokknum í Kanada og stutt Hitler.

Sjálfur sagðist Errol hafa verið mikill andstæðingur aðskilnaðarstefnunnar og því myndast mikil kergja milli hans og tengdaforeldra sinna.