ESB sektar Apple og Meta um rúma hundrað milljarða

Forsetinn bandaríski hefur heitið því að beita tollum gegn ríkjum sem refsa bandarískum fyrirtækjum.

Sektunum hefur verið beitt eftir árslanga rannsókn á því hvort fyrirtækin hafi framfylgt samkeppnisreglum ESB á sviði tæknifyrirtækja

Framkvæmdastjórn ESB opinberaði sektirnar í morgun. Sekt Apple er fimm hundruð milljónir evra (um 72,5 milljarðar króna) en sekt Meta er tvö hundruð milljónir evra (um 29 milljarðar króna).

Forsvarsmönnum Apple hefur verið skipað að auka aðgengi framleiðanda snjallforrita að stýrikerfi Apple og gera notendum auðveldar að kaupa þjónustu og vöru utan verslunar fyrirtækisins.

Þegar kemur að Meta er til skoðunar hvort það að bjóða evrópskum notendum auglýsingar sem notast við minna af persónuupplýsingum á Facebook og Instagram sé í takt við lög ESB. Áður hafði fyrirtækið boðið þessa þjónustu fyrir áskriftargjald eða gert notendum að samþykkja að persónuupplýsingar þeirra væru notaðar.

Þetta þótt ekki duga til og hefur Meta verið sektað fyrir tímabilið þegar þessi þjónusta var það eina sem var í boði fyrir notendur í Evrópu.

Áðurnefnd lög heimila sektir sem samsvara allt að tíu prósentum af árstekjum fyrirtækja en samkvæmt frétt Wall Street Journal eru þessar sektir langt þar frá. Þær samsvarar þess í stað um 0,1 prósenti af árstekjum fyrirtækjanna.

Þetta er ekki í fyrsta sinn sem ESB sektar fyrirtækin. Apple var í fyrra sektað um tvo milljarða dala vegna einokunar.

Þá hefur framkvæmdastjórnin einnig til skoðunar að beita X, samfélagsmiðlafyrirtæki Elons Musk háum sektum vegna brota á lögum sambandsins um ólöglegt efni og upplýsingaóreiðu.

Forsvarsmenn Apple segja í svari við fyrirspurn Reuters að þessi nýja sekt sé enn eitt dæmið um ósanngjarnar ákvarðanir leiðtoga ESB í garð fyrirtækisins. Þessar ákvarðanir komi niður á öryggi notenda og gæðum vara fyrirtækisins. Þeim sé ætlað að þvinga Apple til að gefa tækni fyrirtækisins.

Forsvarsmenn Meta segja í yfirlýsingu að framkvæmdastjórnin sé að reyna að kippa fótunum undan bandarískum fyrirtækjum en kínversk og evrópsk fyrirtæki fái að starfa við aðrar og betri aðstæður.

Í yfirlýsingunni segir að framkvæmdastjórnin vilji þvinga Meta til að grípa til kostnaðarsamra breytinga og í senn veita verri þjónustu.