Eldur og Amaroq í sviðsljósi erlendra fjölmiðla

Elín Margrét Böðvarsdóttir skrifar 8. janúar 2026 14:27

Eldur Ólafsson er stofnandi og forstjóri málmleitarfélagsins Amaroq minerals, sem vinnur að gullgreftri í Grænlandi.

Eldur Ólafsson, framkvæmdastjóri Amaroq, er áberandi í stórum erlendum fjölmiðlum í dag, en hann hefur meðal annars verið á skjánum í sjónvarpsviðtölum hjá Bloomberg og CNBC. Hann segir að umræðan um Grænland hafi haft jákvæð áhrif á fyrirtækið en segja má að ákveðin stigmögnun hafi orðið í umræðunni um vilja Trump-stjórnarinnar um að eignast Grænland í vikunni. Amaroq er stærsta námufyrirtækið með starfsemi á Grænlandi þar sem það grefur bæði eftir gulli og öðrum fágætum málmum, sem stundum eru kallaðir þjóðaröryggismálmar.

Samkvæmt upplýsingum frá Amaroq hefur fyrirtækið í þessari viku fundið fyrir töluverðum áhuga og hefur fengið fyrirspurnir frá „flestum stóru fréttamiðlunum í hinum vestræna heimi,“ eins og það er orðað í svari til Vísis.

Í viðtali við Bloomberg í dag var Eldur spurður hvort hann líti á Trump Bandaríkjaforseta sem vin eða fjandmann, og hvort hann eigi von á að staðan eigi eftir að taka dramatískum breytingum. Í svari sínu rifjaði Eldur upp að það séu allnokkur ár síðan Trump hafi fyrst viðrað áhuga sinn á Grænlandi.

Sér stór tækifæri í stöðunni fyrir Grænland

„Hann kom Grænlandi á kortið. Fólk sá að það eru auðlindir þarna, þetta er gott landsvæði og þetta er norrænt land,“ sagði Eldur. Umræðan hafi róast eftir að síðara kjörtímabili Trumps lauk, en nú sé hann að endurtaka leikinn.

Eldur sér fram á að Amaroq verði stærsti skattgreiðandi á Grænlandi strax á næsta ári. Þá er gullfundur síðastliðið sumar talinn einn sá stærsti í heiminum undanfarinn áratug.

„Ég held að hann vilji engan tíma missa til að gera eitthvað þarna og ég held að heilt yfir sé það gott vegna þess að Grænland þarf á fjárfestingu að halda. Og við sem fyrirtæki erum með danska fjárfesta og bandaríska fjárfesta,“ sagði Eldur. Opnað hafi verið á fjárfestingar fyrir þessa aðila í maí í fyrra og það hafi verið árangursríkt. Aðspurður svaraði hann því játandi að umræðan um Grænland hafi haft jákvæð áhrif á fyrirtækið.

„Það er mjög mikilvægt að bæði Norðurlönd og Bandaríkin vinni saman, með Grænlandi. En á endanum eru það Grænlendingar sem taka ákvörðun, við erum grænlenskt fyrirtæki og við vinnum fyrir þeirra hagsmuni, en við þurfum á því að halda að hagsmunir beggja haldist í hendur til að láta hlutina ganga,“ sagði Eldur.

Ísland mikilvægur liður í starfseminni

Í viðtalinu útskýrði Eldur einnig og undirstrikaði hvers vegna það er fyrirtækinu mikilvægt að vera með skrifstofur á Íslandi og hvernig það styður við rekstur og fjölbreyttar aðfangakeðjur fyrirtækisins að vera vel tengd við Ísland.

Eftir að hafa rakið það jákvæða sem Eldur sér við umræðuna var hann einnig spurður hvort hann sæi eitthvað neikvætt við það með hvaða hætti orðræða Trump um Grænland hefur verið og viðbrögðin við henni. Skilja mætti af svari Elds að hann hafi litla trú á því að ráðist verði á Grænland. Hann skilji þó mjög vel að fólk sé ekki sátt við orðræðuna gagnvart Grænlandi, hann og Íslendingar styðji fyllilega við Grænland og þeirra rétt til að ákvarða framtíð sína sjálfir. Hann eigi sjálfur ættingja á Grænlandi en það séu hans skilaboð til Grænlendinga að þeir séu nú í kjörstöðu til að taka ákvörðun um framtíð sína og byggja upp efnahaginn. Nú sé tækifæri til að efla efnahagslegt sjálfstæði Grænlands og þétt samstarf bæði með Norðurlöndum og Bandaríkjunum geti stuðlað að því.

Í viðtali við CNBC talar Eldur á svipuðum nótum, og ítrekar tækifærin sem hann segir blasa við á Grænlandi.

Fréttin hefur verið uppfærð.

Námuvinnsla Amaroq Minerals Fjölmiðlar Grænland Bandaríkin Hótanir Bandaríkjanna vegna Grænlands