Eitt besta leitarárið á norska land­grunninu

Þetta kemur fram í árlegri samantekt Landgrunnsstofnunar Noregs, sem áður hét Olíustofnun Noregs. Þar segir forstöðumaður stofnunarinnar, Torgeir Stordal, það hvetjandi að sjá að enn sé mögulegt að ná árangri í leit á landgrunnssvæðum sem þegar séu vel nýtt og þróuð.

„Margar og nokkrar mikilvægar uppgötvanir hafa verið gerðar. Nokkrar af uppgötvunum eru afleiðing þess að ný og háþróuð tækni hefur verið tekin í notkun. Meðal annars hafa verið boraðar borholur á yfir tíu kílómetra dýpi,“ segir stofnunin.

Boraðar voru alls 49 holur í lögsögu Noregs á árinu. Af þeim reyndist 21 hola geyma olíu eða gas. Bráðabirgðatölur áætla að þær geti skilað 67 milljónum rúmmetra olíuígilda, sem samsvarar 424 milljónum olíutunna. Tvöfalt meira fannst af olíu en gasi.

Langstærsti fundurinn var í ágúst á Yggdrasils-svæðinu í Norðursjó um 180 kílómetra vestur af Bergen í verkefni sem kallast Omega Alfa. Olíufélagið Aker BP metur olíufundinn þar upp á 96 til 134 milljónir olíutunna og segir hann einn þann stærsta við Noreg í áratugi. Þar fór borinn niður á 10,7 kílómetra dýpi.

Næstmesti olíu- og gasfundurinn var í mars á svæði sem kallast Kjøttkake, eða Kjötbolla. Það svæði er um 27 kílómetra frá Troll C-gasvinnslusvæðinu, sem er um 65 kílómetra vestur af Sognfirði. Fundurinn er metinn á 39 til 75 milljónir olíutunna.

Bæði framleiðsla og fjárfestingar norska olíuiðnðarins reyndust mjög miklar á árinu 2025. Olíuvinnslan, upp á 106 milljónir rúmmetra, reyndist sú mesta frá árinu 2009 en lítilsháttar samdráttur varð í gasvinnslu frá metárinu 2024. Samtals voru um 120 milljarðar rúmmetra af gasi seldir. Framleiðsla á norska landgrunninu skiptist nokkurn veginn jafnt á milli olíu og gass.

„Við búumst við að gasvinnsla haldist á þessu stigi næstu þrjú til fjögur árin. Norskt gas nemur um 30 prósentum af gasnotkun Evrópusambandsins og Noregur er stærsti birgir Evrópu eftir að gas hætti að berast frá Rússlandi,“ segir Stordal.

Norska landgrunnsstofnunin áætlar að fjárfestingar í leit og vinnslu á árinu 2026 verði um 256 milljarðar norskra króna. Það sé 6,5 prósentum minna en á síðasta ári. Jafnframt er því spáð að fram til ársins 2030 muni fjárfestingarstigið smám saman minnka sem og heildarframleiðsla. Því þurfi að taka ákvarðanir um meiri leit á olíusvæðum Noregs innan skamms tíma ef hægja eigi á yfirvofandi framleiðsluminnkun.

„Mikilvægt er að viðhalda mikilli leit. Skortur á fjárfestingum mun leiða til verulegs samdráttar í olíuiðnaðinum,“ segir Landgrunnsstofnun Noregs.