Sigurinn blasir við Clark en Scheffler lætur sig dreyma

Bein útsending frá lokahringnum á Opna bandaríska mótinu hefst klukkan 15 á Sýn Sport í dag.

Clark hefur spilað eins og engill á Shinnecock Hills-vellinum til þessa og erfitt að sjá fyrir sér annað en að hann vinni mótið í annað sinn, eftir að hafa einnig fagnað sigri árið 2023. Það er eini risamótstitill þessa 32 ára kylfings til þessa.

Clark lék á pari vallarins í gær en grunnurinn að góðri stöðu hans er fyrsti hringurinn sem hann lék stórkostlega, eða á -6 höggum, og ljóst að hann ætti að vera í mun betra skapi en í fyrra þegar Clark tók æðiskast inni í búningsklefa og var settur í bann á Oakmont-vellinum sem þá var spilað á.

Fjórir kylfingar koma næstir á eftir Clark, á samtals -1 höggi, en þar á meðal er Scheffler sem eftir að hafa spilað fyrsta hringinn á +2 höggum hefur náð að rétta vel úr kútnum og verður nú í lokaráshópnum með Clark.

Efstu menn: -7 Wyndham Clark (BNA); -1 Scottie Scheffler (BNA), Sahith Theegala (BNA), Tom Kim (KÓR), Sam Stevens (BNA).

Valdir kylfingar: PAR Xander Schauffele (BNA); +1 Tommy Fleetwood (ENG), Collin Morikawa (BNA), Matt Fitzpatrick (ENG); +3 Rory McIlroy (NÍR); +4 Justin Rose (ENG); +7 Ludvig Åberg (SVÍ).

Það hefur bara einu sinni gerst á risamóti, frá fyrsta Masters-mótinu árið 1934, að kylfingur hefur misst niður sex högga forskot á lokadegi. Það var þegar Nick Faldo náði í sinn þriðja Masters-titil árið 1996 og sló Greg Norman við. Clark ætti því að vera með gott sjálfstraust fyrir lokahringinn:

„Mér líður vel. Þetta hefur orðið þægilegra með hverju árinu, að vera í svona stöðu. Scottie er besti kylfingur heims og mun eflaust spila vel. Hann gerir það alltaf en það er gott að hafa sex högga forskot á hann,“ sagði Clark.

Það þarf allt að ganga upp hjá Scheffler en með sigri á Opna bandaríska yrði hann búinn að vinna öll fjögur risamótin. Aðeins þeir Gene Sarazen, Ben Hogan, Gary Player, Jack Nicklaus, Tiger Woods, og Rory McIlroy hafa afrekað það.

„Það yrði mjög sérstakt. Þetta mót hefur svo mikla þýðingu fyrir mig. Það eina sem ég get gert er að leggja allt í sölurnar. Ég er með tækifæri til að fara þarna út, eiga frábæran hring og veita sjálfum mér möguleika á að vinna mótið,“ sagði Scheffler.