Hætta við kaup á vef- og útvarpsmiðlum Sýnar

Er þetta meðal þess sem fram kemur í tilkynningu Sýnar til Kauphallar en Sýn og Ásar, móðurfélag Símans, undirrituðu skilmálaskjal um fyrirhuguð kaup 12. mars síðastliðinn. 

Samkvæmt tilkynningunni er frestur samkvæmt skilmálaskjalinu nú liðinn og samningaviðræðum félaganna þar með lokið. Einkaréttur Ása til samningaviðræðna er jafnframt fallinn niður.

Vefmiðlar og útvarpsstöðvar Sýnar verða því áfram innan félagsins. Í tilkynningunni segir að um sé að ræða öflugar einingar í góðum rekstri sem muni áfram styðja við kjarnastarfsemi Sýnar.

Niðurstaðan hafi ekki áhrif á útgefna afkomuspá Sýnar fyrir árið 2026.

Náðu ekki saman um viðskiptin

Óljóst er hvers vegna viðskiptin gengu ekki eftir en þau voru háð niðurstöðu áreiðanleikakönnunar og samþykki beggja stjórna.

Í tilkynningu Ása hf. til kauphallar segir að þessi niðurstaða hafi orðið ljós eftir „viðræður í kjölfar áreiðanleikakönnunar“ en Sýn segist hafa uppfyllt forsendur skilmálaskjalsins, þar á meðal forsendur fyrir umsömdu kaupverði er lúta að tekjum og rekstrarafkomu fjölmiðlaeiningarinnar.

Rekstrareiningin sem um ræddi inniheldur vefmiðlana Vísi, Já.is, Innherja og Bland.is ásamt útvarpsmiðlum Bylgjunnar, Léttbylgjunnar, Gullbylgjunnar, FM957, X977 og hlaðvarpsveitunni Tal.

Vísir er í eigu Sýnar.