Þriðjungur til Þórs og KA en rúmt pró­sent í menninguna

Umhverfis- og mannvirkjaráð Akureyrar vinnur nú að fjárhags- og framkvæmdaáætlun fyrir þetta kjörtímabil. Tillögu meirihluta ráðsins hefur verið vísað til bæjarráðs til fyrstu umræðu. 

„Ég játa að þegar ég fékk loks tölurnar til yfirlestrar fannst mér svolítið erfitt að skilja samhengi þeirra. Kannski vegna þess að ég held hvorki með KA né Þór,“ segir Kristín Helga Sciöth, fulltrúi Samfylkingarinnar í ráðinu, í grein í Vikublaðinu. 

Í tillögunni er áætlað að þriðjungur framkvæmdafjár í A-hluta reksturs bæjarins, eða fjórir milljarðar króna, fari til Þórs og KA, sem eru stærstu íþróttafélög bæjarins. Í mars var undirritað samkomulag milli Þórs og bæjarins um uppbyggingu íþróttamiðstöðvar á svæði félagsins og KA hefur síðustu ár unnið að uppbyggingu nýrrar stúku og félagsheimilis.

Kristín nefnir til samanburðar að 1,3 prósent fari til menningarmála og 0,34 prósent séu eyrnamerkt bruna- og almannavörnum. 

„Nú tel ég víst að einhverjir ranghvolfi augunum yfir þessum snemm-miðaldra antisportista sem skilur ekki mikilvægi íþróttamannvirkja. En skortur minn á keppnisskapi á áhorfendapöllum þýðir ekki að ég sé með öllu áhugalaus um íþróttastarf. Ég á til að mynda börn sem stunda íþróttir af kappi og veit mætavel hversu mikilvægt öflugt íþróttastarf og aðgengi að því er samfélaginu, ekki síst börnum og ungu fólki. Ég ber mikla virðingu fyrir hugsjónum þeirra sem standa að íþróttastarfi og öllu því öfluga sjálfboðaliða- og grasrótarstarfi sem fer fram í bænum,“ segir Kristín. 

Eitt megi ekki alltaf trompa allt annað

Hins vegar haldi hún með öllu íþrótta-, menningar- og tómstundalífi á Akureyri. 

„Mest af öllu held ég með sanngjarnri ráðstöfun úr sameiginlegum sjóðum og samnýtingu innviða þegar það á við. Ég átta mig á því að það er ekki hægt að gera allt fyrir alla í einu. En þegar við setjum gríðarstór uppbyggingarverkefni tveggja íþróttafélaga í forgang ár eftir ár, kjörtímabil eftir kjörtímabil, ýtum við óhjákvæmilega öðrum verkefnum aftar í röðina – eða hreinlega út af borðinu,“ segir Kristín. 

Má ekki deila velli?

Hún nefnir að í Mílanó á Ítalíu deili erkifjendurnir AC Milan og Inter Milan heimavelli og hafi gert í áratugi. Við það má bæta að Þór og KA hafa lengi verið með samstarf bæði í kvennafótbolta og -handbolta. 

„Tvö sjálfstæð knattspyrnufélög með ríka sögu sem deila keppnisvelli án þess að það dragi úr sérstöðu þeirra eða sjálfsmynd. Ég játa að ég á erfitt með að skilja að slík samnýting geti ekki gengið í 20.000 manna samfélagi á Íslandi,“ segir Kristín.