Duncan tekur sæti Ming í byrjunarliðinu

Það er nú orðið ljóst að Tim Duncan, leikmaður San Antonio Spurs, mun taka sæti Yao Ming í byrjunarliði Vesturdeildarinnar í Stjörnuleiknum sem fram fer aðfararnótt mánudags.

Þjálfari Vesturdeildarinnar er Gregg Popovich sem einmitt þjálfar Spurs og hann var aldrei í vafa um að Duncan væri rétti maðurinn í starfið.

"Mér finnst það algjörlega vera við hæfi og í raun augljóst að hann eigi að byrja," sagði Popovich.

Ekki eru allir sammála honum en einhverjir vildu sjá ungstirnið Blake Griffin fá tækifæri nú eða Kevin Love. Báðir hafa skilað betri tölum en Duncan í vetur.