„Þetta er í rauninni þreyfingafundur“

Þá gagnrýndi Trump einnig Vólódímír Selenskí, forseta Úkraínu, fyrir ummæli um að hann gæti ekki, samkvæmt stjórnarskrá Úkraínu, látið landsvæði af hendi án þjóðaratkvæðagreiðslu. Trump gaf einnig í skyn að innrás Rússa í Úkraínu væri Selenskí að kenna, ekki Rússum.

„Hann er með samþykki til að fara í stríð og drepa alla en þarf samþykki til að skiptast á landi. Því það mun þurfa að skipta á landsvæði. Ég veit það gegnum Rússland og gegnum samtöl við alla,“ sagði Trump meðal annars, eins og sjá má í meðfylgjandi myndbandi.

Trump sagði einnig að skipti á landsvæðum yrðu bæði góð og slæm fyrir Úkraínumenn og Rússa. Rússar hefðu hernumið stóran hluta Úkarínu og að miklu leyti strandlengju ríkisins, sem er rétt.

Þetta var meðal þess sem Trump sagði á blaðamannafundi í dag, þar sem hann var aðallega að ræða yfirtöku alríkisins á löggæslu í Washington DC og boða svipaðar aðgerðir í fleiri borgum Bandaríkjanna, ræddi Trump einnig um fundinn á föstudaginn, sem á að fara fram í Alaska.

Hann sagði Pútín hafa boðið sér og að hann vildi líklega frið. Trump viðurkenndi þó að hann hefði sagt það um Pútín nokkrum sinnum áður að undanförnu, án þess þó að friður kæmist á.

Sjá einnig: Sagður slaka á kröfum og úti­loka ekki landsvæðaskipti

Stutt er síðan Trump gaf Pútín stuttan frest til að semja um frið, annars myndi hann herða refsiaðgerðir gegn Rússlandi. Þá gagnrýndi Trump Pútín fyrir að gefa í skyn við sig að hann vildi frið en gera svo strax mannskæðar árásir á óbreytta borgara í Úkraínu.

„Við héldum nokkrum sinnum að við værum að ljúka þessu en þá byrjaði Pútín að skjóta eldflaugum inn í einhverja borg, eins og Kiyv, og drepur mikið af fólki á elliheimili eða einhvers staðar. Við erum með lík um alla götuna,“ sagði Trump í Skotlandi í síðasta mánuði.

Sjá einnig: Fækkar dögunum sem hann gaf Pútín

Á einum tímapunkti sagði Trump að hann myndi líklega vita það á fyrstu tveimur mínútunum með Pútín, hvort friður væri mögulegur. Þegar hann var spurður hvernig sagði hann:

„Af því að þetta er það sem ég geri. Ég geri samninga.“

Eins og sjá má í samantektarmyndbandi AP fréttaveitunnar, þar sem nokkur ummæli hans um Úkraínu hafa verið tekin saman, sagði Trump að ef hann gæti gert sanngjarnt samkomulag myndi hann fara með það til leiðtoga Evrópu og NATO en fyrst myndi hann ræða við Vólódímír Selenskí, forseta Úkraínu.

Hann sagðist seinna meir vilja koma Selenskí og Pútín saman í herbergi. Selenskí og fleiri hafa ítrekað kallað eftir slíkum fundi en Pútín hefur hafnað því.

Óttast afleik Trumps

Ráðamenn í Evrópu eru sagðir hafa áhyggjur af því hve óljós ummæli frá Trump-liðum hafa verið undanfarna daga, varðandi kröfur Pútíns og skilyrði hans fyrir vopnahléi. Samkvæmt Guardian snýst óttinn að miklu leyti um að Trump muni reyna að skuldbinda Úkraínumenn til óásættanlegra skilyrða.

Útlit er fyrir að nokkrir evrópskir þjóðarleiðtogar og Selenskí muni eiga fjarfund á miðvikudaginn. Trump hefur verið boðið á fundinn en óljóst er hvort hann muni taka þátt. Til stendur að nota fundinn til að leggja línurnar fyrir viðræður Trumps og Pútíns á föstudaginn. 

Markmið Rússa og kröfur þeirra í garð Úkraínumanna virðast lítið hafa breyst frá því innrás þeirra hófst í febrúar 2022. Úkraínumenn hafa ítrekað sagt þessar kröfur vera óásættanlegar þar sem þær geri ríkið berskjaldað gegn annarri innrás og að Úkraína verði í raun leppríki Rússlands. Um uppgjöf væri að ræða.

Sjá einnig: Með sömu óásættanlegu kröfurnar

Þá sagði Pútín á dögunum að innrásina í Úkraínu þyrfti að ræða í samhengi fyrir öryggi allrar Evrópu. Í fyrri ummælum hefur Pútín látið sambærileg orð falla um kröfu sína um að ríkjum Austur-Evrópu verði vísað úr Atlantshafsbandalaginu.

Fyrir innrásina í Úkraínu krafðist Pútín þess að Úkraínu yrði meinaður aðgangur að NATO og að bandalagið myndi flytja alla hermenn og búnað úr aðildarríkjum sem gengu til liðs við bandalagið eftir 1997. Þar á meðal eru Pólland og Eystrasaltsríkin, sem hafa varað við því að Rússar vilji auka umsvif sín á svæðinu og draga úr fullveldi þeirra.