Íslandsmeistarinn er farinn til Bandaríkjanna

Fjórða og næstsíðasta mótið á Eimskipsmótaröðinni í golfi á þessu keppnistímabili hefst á Kiðjabergsvelli í dag. Íslandsmeistararnir í höggleik karla og kvenna eru fjarverandi á Securitas-mótinu vegna verkefna erlendis en keppni um stigameistaratitilinn er gríðarlega spennandi.

Haraldur Franklín Magnús úr GR, sem er tvöfaldur Íslandsmeistari á þessu tímabili, í holukeppni og höggleik, mun ekki leika á fleiri mótum á þessu tímabili hér á landi vegna háskólanáms í Bandaríkjunum. Valdís Þóra Jónsdóttir, Íslandsmeistari í höggleik kvenna, er að keppa með íslenska landsliðinu í Finnlandi líkt og Arnór Ingi Finnbjörnsson úr GR, Bjarki Pétursson úr GB og Rúnar Arnórsson úr GK.

Birgir Leifur Hafþórsson úr GKG er að keppa á Áskorendamótaröðinni í Danmörku og stór hópur ungra afrekskylfinga er að keppa með sínum sveitum á Íslandsmóti unglinga sem fram fer á Akureyri.

Keppnisfyrirkomulagið er með þeim hætti að leiknar verða 54 holur samtals, 18 holur á dag í þrjá daga og ættu úrslitin að ráðast síðdegis á sunnudag.

Keppni um efstu sætin á stigalista Eimskipsmótaraðarinnar er hörð og spennandi. Haraldur Franklín er þar efstur með 5.266 stig en þar á eftir kemur Hlynur Geir Hjartarson úr GOS, með 4.205 stig. Hann verður á meðal keppenda líkt og Þórður Rafn Gissurarson úr GR sem er í þriðja sæti með 3.997 stig.

GR-ingarnir Andri Þór Björnsson og Guðmundur Ágúst Kristjánsson mæta einnig til leiks í Kiðjabergið en þeir eru í 6. og 7. sæti stigalistans. Þrátt fyrir að það vanti marga góða kylfinga á þetta mót eru tólf af alls tuttugu efstu á stigalistanum skráðir til leiks.

Signý Arnórsdóttir, GK, Íslandsmeistari í holukeppni kvenna, er efst á stigalistanum (4.692 stig) og hún verður með í Kiðjaberginu. Ólafía Þórunn Kristinsdóttir úr GR (4.502 stig) og Guðrún Brá Björgvinsdóttir (84.232 stig) úr GK eru í öðru og þriðja sæti og þær verða báðar með á þessu móti.